Félagsmálaráðuneytið hefur gefið út nýja bifreiðareglugerð, um uppbætur og styrki til hreyfihamlaðra einstaklinga vegna bifreiða. Reglugerðin tók gildi 1. september sl. og er nr. 905/2021. Samkvæmt henni geta endurhæfingarlífeyrisþegar  nú sótt um uppbót vegna reksturs bifreiðar, en þetta er í fyrsta skipti sem þeir geta sótt um slíka uppbót, að öðrum skilyrðum uppfylltum. Hingað til hafa eingöngu hreyfihamlaðir elli- eða örorkulífeyrisþegar og örorkustyrksþegar getað fengið uppbót til að mæta kostnaði við rekstur bifreiðar.

 Hjón og sambýlisfólk geta sótt um styrk til kaupa á sömu bifreið

Aðrar breytingar sem vakin er athygli á er að hjón og sambýlisfólk geta bæði sótt um uppbót/styrk til kaupa á sömu bifreið. Þegar fullorðnir hafa sótt um uppbót/styrk vegna bifeiðakaupa þá hefur hingað til einungis verið greidd ein uppbót eða styrkur vegna hverrar bifreiðar. Rétt er að taka fram að sameiginlegir styrkir hjóna/sambýlisfólks geta aldrei verið hærri en kaupverð bifreiðar.

 Hærri uppbót til þeirra sem hafa ekki átt bifreið í 10 ár

Þeir sem eru að kaupa bifreið í fyrsta skipti hafa  getað fengið 720.000 kr. í uppbót vegna bifreiðakaupa í stað 360.000 kr. Samkvæmt nýju reglugerðinni þá geta einnig þeir sem ekki hafa átt bifreið í 10 ár áður en sótt er um einnig fengið hærri uppbótina.