Örorkustyrkur

Örorkustyrkur er hugsaður fyrir einstaklinga sem bera verulegan aukakostnað vegna örorku sinnar til dæmis vegna lyfja, læknishjálpar eða hjálpartækja.

Hverjir eiga mögulegan rétt á örorkustyrk?

Þeir sem eru á aldrinum 18-67 ára geta átt rétt á örorkustyrk. Skilyrði er að umsækjandi hafi verið búsettur á Íslandi a.m.k. þrjú síðustu árin áður en umsókn er lögð fram eða í sex mánuði ef starfsorka var óskert þegar hann tók hér búsetu. Einnig þarf að liggja fyrir mat tryggingalæknis um að umsækjandi hafi misst a.m.k. 50% af starfsorku sinni en nái ekki 75% starfsorkumissi.

Hvað er örorkustyrkur?

Örorkustyrkur er tekjutengdur bótaflokkur og getur hæstur verið u.þ.b. 3/4 af fullum örorkulífeyri fyrir fólk á aldrinum 18-61 árs. Örorkustyrkur er hins vegar jafnhár örorkulífeyri fyrir fólk á aldrinum 62-67 ára. Greiðslur eru reiknaðar út frá tekjum í tekjuáætlun sem þarf að fylgja með umsókn.

Engar viðbótargreiðslur eru með örorkustyrk nema til þeirra sem hafa börn innan 18 ára á framfæri sínu. Viðbótin er 75% af barnalífeyri fyrir hvert barn á framfæri umsækjanda.

Fullur örorkustyrkur er greiddur ef árstekjur örorkustyrkþegans eru undir 2.575.220 kr. og nemur þá ¾ af grunnlífeyri. Greiðslur lækka með hækkandi tekjum og falla niður við árstekjur 3.981.332 kr. 

Tekjur maka hafa ekki áhrif á greiðslur, nema fjármagnstekjur sem eru reiknaðar sameiginlega hjá sambúðarfólki/hjónum. Reiknað er með helmingi hjá hvoru um sig við útreikning bóta.

Hvenær fellur örorkustyrkur niður?   

• ef árstekjur fara yfir 3.981.332 kr.
• þegar endurnýjað mat er undir 50% eða nær 75% örorkumati
• þegar einstaklingur verður 67 ára, því þá öðlast hann rétt til ellilífeyris og þarf að sækja sérstaklega um hann
• ef endurnýjun á örorkumati berst of seint til Tryggingastofnunar fellur örorkustyrkur niður þar til nýtt örorkumat hefur verið afgreitt
• ef búsetuskilyrði eru ekki uppfyllt
• við andlát