Þinn réttur: Efnahagsástandið og lífeyrir almannatrygginga
Lífeyrisþegum fjölgar væntanlega
Búist er við að bæði ellilífeyrisþegum og örorkulífeyrisþegum fjölgi næsta árið. Hætta er á að með vaxandi atvinnuleysi og fjárhagslegu óöryggi finni fleiri til líkamlegrar og andlegrar vanlíðunar sem getur leitt af sér langvinna sjúkdóma og örorku. Jafnframt er líklegt að einhverjir hefji töku ellilífeyris fyrr og vinni minna eftir að 67 ára aldri er náð en þeir hefðu gert við óbreyttar aðstæður.
Lægri tekjur, hærri greiðslur
Margir eldri borgarar fjárfestu í hlutabréfum og verðbréfum og áttu von á að bera úr bítum fjármagnstekjur. Þessar fjárfestingarleiðir standa ekki undir væntingum eins og er og fjármagnstekjur margra verða því minni en þeir áttu von á. Sama máli gegnir um lífeyrissjóðina sem flestir töldu gulltryggða. Lægri fjármagnstekjur og lægri lífeyrissjóðstekjur leiða því í flestum tilvikum til hærri greiðslna frá Tryggingastofnun þó munurinn verði ekki bættur að fullu að óbreyttu réttindakerfi.
Lífeyrisþegar erlendis
Greiðslur til lífeyrisþega sem búa erlendis eru mjög óhagstæðar eins og stendur. Vegna lágs gengis krónunnar gagnvart erlendum gjaldmiðlum eru greiðslurnar verðminni í útlöndum en þær voru fyrir fáum mánuðum. Margir lífeyrisþegar sem búa erlendis fá einungis hluta lífeyris síns héðan en einnig greiðslur frá öðrum löndum, yfirleitt búsetulandinu. Þeir sem fá lágar upphæðir frá TR verða fyrir minni áhrifum vegna aðstæðna á gjaldeyrismarkaði.
Áhrif kreppunnar árið 2008 á hag ellilífeyrisþega gætu þannig orðið margvísleg en munu ekki verða að fullu ljós fyrr en árið verður gert upp um mitt árið 2009.