Eftirlit
Eitt af hlutverkum Tryggingastofnunar er að standa vörð um íslenska velferðarkerfið og verja það misnotkun.
Umsóknir
Sækja þarf um allar bætur til Tryggingastofnunar ríkisins. Til þess að fá bætur þarf að uppfylla tiltekin skilyrði. Í umsókn þarf að gefa ákveðnar upplýsingar sem eru notaðar til þess að ákvarða hvort bótaréttur er fyrir hendi og fjárhæð bóta. Umsækjanda er skylt að veita Tryggingastofnun ríkisins allar nauðsynlegar upplýsingar til þess að hægt sé að taka ákvörðun um bótarétt, fjárhæð og greiðslu bóta og endurskoðun þeirra.
Upplýsingar um aðstæður
Upplýsingar um aðstæður eru afar þýðingarmiklar þegar ákvarða á bótarétt og fjárhæð bóta.
Skortur á upplýsingum
Skortur á upplýsingum getur leitt til frestunar á afgreiðslu umsóknar. Skortur á upplýsingum getur einnig leitt til vangreiðslu eða ofgreiðslu bóta.
Breytingar á tekjum
Umsækjanda og bótaþega er skylt að tilkynna Tryggingastofnun ríkisins um breytingar á tekjum sem verða á yfirstandandi tekjuári.
Breytingar á stöðu og högum
Umsækjanda er ennfremur skylt að tilkynna Tryggingastofnun ríkisins ef breytingar verða á stöðu og högum, t.d. við sambúð, sambúðarslit, hjúskaparstofnun, hjúskaparslit og flutning lögheimilis, innan lands og utan.
Greiðslur umfram réttindi
Þegar greitt er umfram réttindi er ofgreiðslan almennt dregin frá bótum eða viðkomandi krafinn endurgreiðslu.
Vangreiðsla
Vangreiddar bætur eru endurgreiddar bótaþega með vöxtum.
Sviksamlegt atferli - endurgreiðsla með dráttarvöxtum
Stafi ofgreiðsla bóta til bótaþega af sviksamlegu atferli hans, svo sem vegna rangra upplýsinga er bótaþega skylt að endurgreiða Tryggingastofnun ríkisins fjárhæðina með dráttarvöxtum.