Lífeyrisréttindi
Upphæð lífeyrisgreiðslna fer eftir aðstæðum og tekjum hvers og eins.
Ellilífeyrir
Réttur til ellilífeyris myndast við 67 ára aldur. Sá sem náð hefur þeim aldri og hefur búið hér á landi í minnst þrjú ár á aldrinum 16-67 ára getur átt rétt á greiðslu ellilífeyris. Upphæð lífeyris fer eftir aðstæðum og tekjum hvers og eins. Sú skylda hvílir á umsækjendum að veita Tryggingastofnun réttar og nauðsynlegar upplýsingar um tekjur og persónulegar aðstæður til þess að hægt sé að taka ákvörðun um rétt til greiðslna, fjárhæð og endurskoðun þeirra. Því þarf að tilkynna Tryggingastofnun um allar breytingar á tekjum og persónulegum aðstæðum svo sem heimilisaðstæðum, hjúskaparstöðu eða flutning úr landi.
Ellilífeyrisþegi getur einnig átt rétt á tekjutryggingu sem er greidd út ef tekjur viðkomandi eru undir ákveðnum viðmiðunarmörkum. Þar að auki geta ellilífeyrisþegar átt rétt á uppbótum á ellilífeyri svo sem heimilisuppbót fyrir þá sem búa einir, uppbót vegna lyfjakaupa, umönnunar og vegna reksturs bifreiðar ef um líkamlega hreyfihömlun er að ræða. Þessar greiðslur eru þó allflestar háðar ákveðnum skilyrðum, til dæmis varðandi tekjur lífeyrisþega, búsetu á Íslandi, heimilisaðstæður og fleira. Sérstök uppbót til framfærslu tryggir lífeyrisþegum mánaðarlega lágmarksfjárhæð. Fjárhæðin er mismunandi eftir því hvort fólk býr eitt eða er í sambúð. Allar tekjur hafa áhrif við útreikning á þessum bótaflokki.
Örorkulífeyrir
Tryggingastofnun greiðir örorkulífeyri til einstaklinga sem ekki geta unnið fulla vinnu vegna skertrar starfsgetu. Rétt til örorkulífeyris eiga 75% öryrkjar á aldrinum 18 - 67 ára. Réttur til lífeyris er jafnframt háður búsetu. Til að hægt sé að greiða út örorkulífeyri verður að liggja fyrir örorkumat.
Örorkumat byggist alfarið á læknisfræðilegum forsendum. Eftir að fullnægjandi umsókn einstaklings um örorkulífeyri og vottorð frá lækni hefur borist Tryggingastofnun er umsækjanda sendur spurningalisti. Með því að svara spurningunum leggur umsækjandi sjálfur mat á eigin getu eða færni og fær tækifæri til að koma sjónarmiðum sínum á framfæri við tryggingalækni TR milliliðalaust.
Að jafnaði er síðan fengið álit læknis, sem starfar utan TR, á einstökum þáttum færniskerðingar og er umsækjandi boðaður til viðtals í því skyni. Læknisvottorð, svör umsækjanda við spurningalista og álitsgerð læknisins eru svo grunnur að mati tryggingalæknis á örorku umsækjanda. Að loknu mati er það sent áfram til réttindasviðs Tryggingastofnunar eða til umboða utan Reykjavíkur og berst niðurstaða mats til umsækjanda þaðan.
Örorkulífeyrisþegar geta einnig átt rétt á tekjutryggingu. Auk þess getur viðkomandi átt rétt á uppbótum á lífeyri svo sem heimilisuppbót fyrir þá sem búa einir og eru einir með heimilisrekstur, uppbót vegna lyfjakaupa, umönnunar og vegna reksturs bifreiðar ef um líkamlega hreyfihömlun er að ræða. Þessar greiðslur eru þó allflestar háðar ákveðnum skilyrðum, til dæmis varðandi tekjur lífeyrisþega, búsetu á Íslandi, heimilisaðstæður og fleira.