Helstu niðurstöður endurreiknings og uppgjörs bóta vegna ársins 2009
Árlega fer fram endurreikningur og uppgjör á lífeyri og tengdum bótum hjá Tryggingastofnun ríkisins. Niðurstöður fyrir árið 2009 liggja nú fyrir. Greiðslur til lífeyrisþega á árinu 2009 hafa verið bornar saman við tekjuáætlanir og skattframtal fyrir sama ár. Niðurstaðan segir til um hvort lífeyrisþegi hafi fengið greitt út í samræmi við þann rétt sem hann hafði á árinu 2009.
Helstu niðurstöður endurreiknings og uppgjörs vegna ársins 2009
- Fjöldi lífeyrisþega er rúmlega 47 þúsund manns. Ellilífeyrisþegar eru um 30 þúsund og örorkulífeyrisþegar um 17 þúsund.
- 66% lífeyrisþega eða 31 þúsund manns fengu greiðslur innan eðlilegra frávika.
- 24% lífeyrisþega eða 11 þúsund manns fengu ofgreiðslur umfram eðlileg frávik.
- 10% lífeyrisþega eða 5 þúsund manns eiga inneignir umfram eðlileg frávik.
- Heildarfjárhæð endurreiknaðs lífeyris og tengdra bóta er um 47 milljarðar kr.
- Heildarniðurstöður endurreiknings eru 2,6 milljarðar kr. Ofgreiðslur voru 4,3 milljarðar kr. og vangreiðslur 1,7 milljarður kr.
Mismunandi áhrif tekjuflokka á niðurstöðu endurreiknings
Eins og undanfarin ár er munurinn lítill á milli atvinnu- og lífeyrissjóðstekna í tekjuáætlunum 2009 og í skattframtali. Hins vegar voru vextir, verðbætur og arður verulega vanáætluð í tekjuáætlunum lífeyrisþega, eða um 75%. Það er megin skýringin á ofgreiðslum lífeyris og tengdra bóta vegna ársins 2009 en um 22 þúsund lífeyrisþegar sem fengu vexti og verðbætur greindu ekki frá þeim í tekjuáætlunum. Af 4,3 milljarða kr. ofgreiðslum vegna ársins 2009 eru um 3,3 milljarðar kr. vegna fjármagnstekna, en um 1 milljarður kr. vegna atvinnu- og lífeyrissjóðstekna (0,4 atvinnutekjur og 0,6 lífeyrissjóðstekjur).
Næstu daga fá lífeyrisþegar sent bréf með niðurstöðum uppgjörsins. Í því bréfi eru jafnframt upplýsingar frá Ríkisskattstjóra um breytingar sem hafa orðið á tekjum innan ársins 2009.
Niðurstöður uppgjörs verða aðgengilegar fyrir lífeyrisþega á þjónustuvef Tryggingastofnunar, tryggur.is, eftir kl. 15:00 þriðjudaginn 27.júlí n.k.