Vönduð tekjuáætlun, réttari greiðslur
Nú geta lífeyrisþegar skoðað og lagað tillögu Tryggingastofnunar að tekjuáætlun 2011 inná Tryggur – Mínar síður.
Hægt er að breyta tekjuáætlun vegna janúargreiðslu frá 19. nóvember – 9. desember. Í janúar sendir Tryggingastofnun lífeyrisþegum tillögu að tekjuáætlun og greiðsluáætlun fyrir árið 2011 heim í pósti.
Mikilvægt er að lífeyrisþegar leiðrétti tekjuáætlunina ef þörf er á. Það er einfalt og þægilegt að skoða og breyta tekjuáætlun á Tryggur - Mínar síður. Nota þarf veflykil RSK við innskráningu. Ef veflykill hefur glatast er hægt að nálgast nýjan veflykil á næstu skattstofu eða fá hann samstundis í heimabanka. Ef það hentar geta lífeyrisþegar veitt öðrum umboð til þess að sinna sínum málum á Tryggur – Mínar síður. Umboð er veitt á Tryggur – Mínar síður.
Hægt er að fá tekjuáætlunina senda heim á pappír ef þess er óskað með því að hafa samband við Þjónustumiðstöð Tryggingastofnunar eða umboð um land allt.
Tekjuáætlun er forsenda greiðslna Tryggingastofnunar og það er á ábyrgð lífeyrisþega að hún sé vönduð. Rétt tekjuáætlun kemur í veg fyrir óþægindi sem skapast þegar lífeyrisþegar fá ekki réttar greiðslur.
Við gerð tekjuáætlunar er ágætt að hafa eftirfarandi í huga:
- Allar skattskyldar tekjur hafa áhrif.
- Fjármagnstekjur breytast oft á milli ára.
Athugið að um tillögu að tekjuáætlun er að ræða og á ábyrgð lífeyrisþega að leiðrétta ef við á.
Starfsfólk þjónustumiðstöðvar Tryggingastofnunar og umboða um land allt veita fúslega ráðgjöf og aðstoð við gerð tekjuáætlunar.