Eldri borgarar
Ellilífeyrir
Hér má finna upplýsingar um ellilífeyri og tengdar greiðslur sem Tryggingastofnun ríkisins greiðir samkvæmt lögum um almannatryggingar nr. 100/2007 og lögum um félagslega aðstoð 99/2007.
Við töku ellilífeyris frá Tryggingastofnun getur að auki skapast réttur til tekjutryggingar, heimilisuppbótar, vasapeninga(ef einstaklingur dvelur á hjúkrunar- eða dvalarrými) og annarra uppbóta á lífeyri. Þessar greiðslur eru þó allflestar háðar ákveðnum skilyrðum, til dæmis varðandi tekjur lífeyrisþega, búsetutíma á Íslandi, heimilisaðstæður og aðra hagi.
Þeir sem ákveða að hefja töku ellilífeyris geta í mörgum tilvikum einnig átt rétt á greiðslum úr einum eða fleiri lífeyrissjóðum en sækja þarf um þær greiðslur hjá viðeigandi sjóðum.
Allir sem verða 67 ára og hafa búið og starfað á Íslandi í tilskilinn tíma fá sent bréf frá Tryggingastofnun þar sem bent er á mögulegan rétt til ellilífeyris. Bréfinu fylgja eyðublöð fyrir umsóknir og tekjuáætlanir. Þessi blöð þarf að fylla út og senda til Tryggingastofnunar eða umboða utan Reykjavíkur.
Réttur til ellilífeyrisgreiðslna getur náð allt að tvö ár aftur í tímann, hafi ekki verið sótt um lífeyri við 67 ára aldur.
Sækja þarf um allar bætur frá Tryggingastofnun. Þó þurfa þeir sem fá örorkulífeyrisgreiðslur þegar þeir verða 67 ára ekki að sækja sérstaklega um ellilífeyri.
Athugið að sé gert ráð fyrir að vera áfram á vinnumarkaði eftir að 67 ára aldri er náð getur borgað sig að fresta því að sækja um ellilífeyri hjá Tryggingastofnun. Ellilífeyrir, tekjutrygging og heimilisuppbót hækka þá um 0,5% fyrir hvern mánuð fram til 72 ára aldurs, eða að hámarki um 30%.
Á vefnum er hægt að smella á viðeigandi krækjur til að fá greinargóðar upplýsingar um flest það sem viðkemur réttindum eldri borgara. Hér er auk þess að finna eyðublöð sem hægt er að fylla út í tölvu. Þó þarf að prenta þau út til undirritunar. Eins veita þjónusturáðgjafar nánari upplýsingar.
