Mæðralaun/feðralaun

Þessar greiðslur er heimilt að greiða einstæðum foreldrum sem eru búsett á Íslandi og hafa á framfæri tvö börn sín eða fleiri undir 18 ára aldri.

Upphæðir frá 1. janúar 2016:

  •  Laun vegna 2 barna: 8.531 kr. á mánuði.
  • Laun vegna 3 barna eða fleiri: 22.180 kr. á mánuði.

Mæðralaun/feðralaun falla niður við:

  • Að sambúð með öðrum aðila en foreldri barns hefur varað í eitt ár.
  • Að tekin er upp sambúð með foreldri barnanna eða fyrrverandi sambýlisaðila.
  • Að sambúðarfólk eignist barn saman, þó að sambúðin hafi ekki varað eitt ár.
  • Að viðtakandi greiðslnanna gengur í hjúskap.
  • Að viðtakandi greiðslnanna flytur úr landi.

Mæðra/feðralaun eru skattskyld en ekki tekjutengd.

Heimilt er að greiða mæðra- og feðralaun til maka elli- eða örorkulífeyrisþega, þegar bætur almannatrygginga falla vegna vistunar á stofnun. Þá er og heimilt að greiða maka einstaklings sem sætir gæslu- eða refsivist mæðra- eða feðralaun, enda hafi vistin varað a.m.k. þrjá mánuði.

Hvernig sæki ég um mæðralaun/feðralaun?

  • Hægt er að sækja um mæðralaun/feðralaun á Mínum síðum.
  • Einnig má sækja um á  eyðublaðinu    Umsókn um mæðra-/feðralaun og barnalífeyri og skila til þjónustumiðstöðvar Tryggingastofnunar eða í umboð á landsbyggðinni.
  • Skila þarf ljósriti af skilnaðarleyfi/sambúðarslitavottorði sé um það að ræða, eða ljósriti af úrskurðum meðlags.
  • Ef fólk gerir samkomulag milli sín um meðlag, og það ekki greitt í gegnum Tryggingastofnun þarf meðlagsúrskurð frá sýslumanni.
  • Ef umsækjandi er einstæður vegna andláts maka er sótt um mæðra/feðralaun á sama tíma og dánarbætur og þá án fylgigagna, þ.e. ef börn umsækjanda eru börn hins látna.
  • Staðfesting á forsjárbreytingu þarf að koma inn ef umsækjandi hefur ekki verið áður með forsjá barns.
  • Ef umsækjandi er maki refsifanga og vist hans varað lengur en 3 mánuði þarf staðfestingu fangelsismálayfirvalda á refsivistartíma.
  • Ef umsækjandi á maka sem dvelur í langtímavistun á sjúkrastofnun þarf engum fylgigögnum að skila

Afgreiðslutími umsókna um mæðra- og feðralaun er um átta vikur miðað við að öll gögn hafi borist.

Síða yfirfarin/breytt 27.04.2016
Til baka

Barnafjölskyldur

Var efnið hjálplegt? Nei










Þetta vefsvæði byggir á Eplica