Endurhæfingarlífeyrir

Heimilt er að greiða einstaklingum á aldrinum 18-67 ára endurhæfingarlífeyri í allt að 18 mánuði þegar ekki er ljóst hver starfshæfni verður til frambúðar í kjölfar sjúkdóma eða slysa.

Áður en til mats á endurhæfingarlífeyri kemur þarf umsækjandi að hafa lokið áunnum rétti sínum til veikindalauna frá atvinnurekanda, sjúkradagpeningum frá sjúkrasjóði stéttarfélags og eiga ekki rétt á atvinnuleysisbótum.

Ef sérstakar ástæður eru fyrir hendi er hægt að lengja greiðslutímabilið um aðra 18 mánuði.

Hver eru meginskilyrði fyrir greiðslu endurhæfingarlífeyris?

Meginskilyrði fyrir veitingu endurhæfingarlífeyris er að umsækjandi taki þátt í endurhæfingu með starfshæfni að markmiði. Tryggingastofnun metur hvort endurhæfingaráætlun telst fullnægjandi og hefur eftirlit með að henni sé framfylgt og önnur skilyrði uppfyllt. Athygli er vakin á að endurhæfingaráætlun skal vera unnin af lækni/meðferðaraðila eða ráðgjafa í samvinnu við umsækjanda. Eftirfylgni, stuðningur og eftirlit með framgangi endurhæfingar getur verið í höndum læknis/meðferðaraðila eða ráðgjafa sem jafnframt heldur utan um endurhæfinguna.

Þeir sem eiga rétt á þessum greiðslum að uppfylltum skilyrðum eru:

Einstaklingar sem ekki geta sinnt vinnu/námi vegna veikinda eða afleiðinga slysa.
Einstaklingar á aldrinum 18–67 ára.
Einstaklingar sem hafa verið búsettir á Íslandi a.m.k. þrjú síðustu árin áður en umsókn er lögð fram eða í sex mánuði ef starfsorka var óskert er þeir tóku hér búsetu.
Einstaklingar sem hafa lokið áunnum veikindarétti sínum frá atvinnurekanda og greiðslum sjúkra- eða slysadagpeninga frá stéttarfélagi.
Einstaklingar sem ekki eru tryggðir skv. lögum um atvinnuleysistryggingar.
Einstaklingar sem eru í endurhæfingu með starfshæfni að markmiði þar sem raunhæf áætlun um ferli endurhæfingar liggur fyrir.

Sömu reglur gilda um flest réttindi til tengdra bóta og hjá örorkulífeyrisþegum.

Undanskilið er:

Ekki er réttur á bifreiðakaupastyrkjum, bílalánum og niðurfelling á bifreiðagjöldum.
Sjúkrahúsvist í greiningar- og endurhæfingarskyni skemur en eitt ár skerðir ekki greiðslur.
Endurhæfingarlífeyrir er ekki greiddur úr landi.

Skerðing endurhæfingarlífeyris.

Endurhæfingarlífeyrir skerðist vegna búsetu erlendis í hlutfalli við búsetutíma. Allar skattskyldar tekjur skerða endurhæfingarlífeyri nema félagslegar bætur sveitarfélaga, fari tekjur umsækjanda yfir ákveðin tekjumörk.